Июль сарин 13-д Хальмг Таӊһчин Толһач Алексей Орлов ЮФО-н медлд ордг Әрәсән Федерацин субъектмүдин экономическ хәрләцәнә Ассоциацин күцәгч комитетин ахлач Павел Пронинлә харһв. Маӊһдур Элстд болх «Юг» гидг Ассоциацин экономическ советин селвлцәнә бүрдәмҗин төрмүд эн харһлтд хәләгдв.

Эн селвлцәнд Әрәсән Өмн үзгин округин субъектмүдин экономическ халхин министерствсин болн комитетмүдин һардачнр орлцхмн. Селвлцәнд орлцачнр һурвн төрәр өргн  күүндвр тогтахмн гиҗ зуралгдҗана. Тиигәд, РФ-н субъектмүдин социальн-экономическ делгрлтин стратегь белдлһнә төр хәләгдхмн, Астраханск областин болн Краснодарск крайин үлгүрәр конкуренцин делгрлтин Стандарт тохралһна тускар эн регионмудын экономическ делгрлтин министрмүд Александр Руппель болн Элина Полянская илдкл кехмн.

Хальмг Таӊһчин экономикин болн хулд-гүүлгәнә министр Зоя Санджиева эн селвлцәнд бас илдкл кехмн. Таӊһчин муниципальн бүрдәцсин бәәрн залврин органмуд предпринимательств делгрүллһнә болн инвестиционн бәәдл ясруллһна туст күцәҗәх керг-үүлдврмүдин тускар З.Санджиева хувалцад, эн туст хоршагдсн дамшлтын тускар келҗ өгхмн. Келхд, эн дамшлт талдан регионмуд иргчдән олзлхар зуралҗана.

Мана таӊһчин правительствд экономическ зураллһна туст ЮФО-н регионмудын хоршасн дамшлт бас туста болхмн гиҗ Алексей Орлов күндтә гиичд келв. Тер юӊгад гихлә, ода 2020 җил күртл Хальмгин делгрлтин Стратегь олна күүндврт бәәнә. Намртан болхла таӊһчин правительств 2035 җил күртл батлгдх Стратегь белдх зөвтә. Федеральн цутхлӊгин даалһврар, орн-нутгин регионмуд терүг 2019 җилин январин 1 күртл батлҗ авх зөвтә гиҗ таӊһчин Толһач келв.

 

Зургнь: glava.region08.ru