Элстин техническ лицейин географин багш ТатьянаЧемидова, Б.Бадмаевин нертә Баһ Дөрвдә гимназин хальмг келнә болн утх зокъялын багш Александра Очирова, Г.Лазаревин нертә Городовиковск 1-ч тойгта дундын школын эсвин болн информатикин багш Лариса Челбасова таңһчин сурһуль-эрдмин министерств зарлсн марһанд диилвр бәрв. Эдн сән гисн багшнрин тоод орад, шишлң мөрәһәр ачлгдхмн. Ут тоодан марһанд 32багш орлцв.

Марһан Әрәсән сурһуль-эрдмин министерствин зааврас иштә батлгдсн долан кензәр күцәгдв. Тиигәд, багш эврәннь методическ эв-арһ үүдәҗ көдлх зөвтә, тернь талдан багшнрар өргәр болн күцәмҗтәһәр олзлгдх зөвтә, сурһульчнрнь болхла сүл һурвн  җилин туршарт гүн медрл үзүлсн деерән кичәлин хөөтк үүлдвртән бас сән күцәмҗ үзүлх бәәсмн. Бас тер мет багш өдгә цага эв-арһс болн технологийис шунмһаһар олзлдган медүлх зөвтә билә.

 

Интернетәс авсн зург