Нертә гимнастк, Олимпиадын дииләч Алина Макаренко деед сурhуль тѳгсәснә дипломан сән кевәр харсв, гиҗ Б. Б. Городовиковин нертә Хальмг университетин сайт зәңглҗәнә.

Эн ѳдрмүдт экономикин болн предприять hардллhна әңгд давулагджах диплом харслhна кемд Алина «Селәнә эдл-ахун эдлврин кооперативс мѳңгәр тетклhнә диг-даран» гидг шалhлhна кѳдлмшән  ГЭК-ин шалhлтд ѳгв

«Эндр мини җирhлд ончта йовдл учрв. Би йир икәр үүмәтә бәәвү. Гимнастикин кевс деер марhанд орлцснас эн үлү дааврта йовдл болв, юңгад гихлә чи эврәннь багшнрин, шүүврин комиссин гешүдин ѳмн үгән келҗәнәч. Би зѳрц Хальмг унивеситет шүүҗ авсн угав, би Хальмг Таңhчд тѳрләв, тегәд эврәннь тѳрскн университетəн тѳгсәсндән йир байрта бәәнәв. Би экономикин әңг шүүҗ авлав, университетин багшнр нанд шин эрдм дасҗ авхд дѳң-тусан күргв. Цугтаднь ханлтан ѳргҗәнәв. Мана университет йир сән, гүн медрлтә специалистнр белднә, әвртә ректор Бадма Катинович Салаевта», — гиж нертә спортсменк келв.

Ѳдгә цагт Алина Макаренко Москвад бәәнә, болв Элстд бичкн гимнастксиг марhаст белднә, Әрәсән регионмудт мастер-класс ѳгнә.

 

Зургнь: kalmsu.ru