Хар һазра района Адг селәнә А. Болдыревин нертә физкультурн-оздоровительн комплексин ул деер боксин секц секгдв. Энүнд арвта болн терүнәс ах наста 24 бикдүд орна. Уйн наста боксермүдиг спортын мастерин кандидат Дольган Кеквеев сурһмҗллһна. Тренер селәнүр Хальмгин боксин федерацин болн Хар һазра РМО-н үрврәр ирсмн. Келхд, удлго иим секцс таңһчин наадк чигн селәдт секгдхмн.

Хамгин  бичкн көвүд өдр өнҗәд секцд ирнә, икчүднь болхла өдр болһн. Шишлң «Теегин зяңгд» тренерин келсәр, ода деерән эдн боксар Хальмгин федерацин түрүн президент Виктор Яшкуловин санлд нерәдгдсн марһанд белдҗәцхәнә. Адгин уйн боксермүд түрүләд Комсомольск болн Яшкулин спортсменмүдлә харһхмн. Февралин чилгчәр эдн Элстд ирҗ марһанд орлцх.

Адг селәнә администрацин специалист Зула Огулован келсәр, ФОК-ас хол биш спортивн площадк тосхгдх. Тенд волейбольн болн баскетбольн площадк, мини-футбольн поле, гүүдгин төлә дорожк кехмн болн һаза тәвдг тренажермуд тәвхмн. Спортивн объект Каспийск турва сурвҗлһна  консорциумин мөңгәр бәргдҗәнә.

Дулан ирхлә селәнд сойлын болн амрлһна Парк дигтә 3 миңһн кв. метр һазрт секгдхмн. Энд суудг лавкс, хойр фонтан, уульнцин панрмуд кехмн. Бас чигн модд болн цецгәс энд бас суулһхмн. Огулован келсәр, «Первомайский» СПК-н седвәрәр селәнд ке-сәәхн парк бәргдҗәнә. Эн өдрт иргч паркд ус оруллһна болн электрокүчнә сетин инженерн коммуникациг кечксмн, ода бичкдүдин площадк хулдҗ авх үлдв.

 

Санл Куськеев

Зургнь: Черноземельский-район. рф