Хальмг Таңһчин Толһач Бату Хасиков көдлмшин халхар президентин грантын Фондын генеральн директор Илья Чукалинла харһлт давулв. Терүнд Хальмг Таңһчин Правительствин Ахлачин дарук Ирина Шварцман орлцв гиҗ таңһчин Толһачин барин-цергллһн зәңглҗәнә.
Эдн хальмгин коммерческ биш бүрдәцс Фондын марһаст шунмһаһар орлцдгин тускар келцхәв. Тер харһлтд Әрәсән Президент Владимир Путинә седвәрәр, эн җил президентин грантын Фонд региональн коммерческ биш бүрдәцсиг дөңнтхә гиһәд, терүнд немр һурвн җува арслң йилһгдҗ өггдх гиҗ темдглгдв. Региона Толһачин темдглсәр, Хальмг Таңһч марһаст шунмһа кевәр орлцх саната. Хальмг Таңһчин Правительствин медлд көдлмшин баг бүрдәгдв, тер баг коммерческ биш бүрдәцст документ белдхд нөкд болх. Дәкәд Бату Хасиковин келсәр, Көрңгин цутхлң бүрдәх зуралгдҗана. Эн цутхлңгин һол күсл Фондын марһаст орлцхин төлә кергтә төсвс олҗ авлһн, белдлһн болх. Илья Чукалин таңһчд нөкд болхдан белн бәәхән медүләд, цутхлң бүрдәхәр седҗәх санан-седклиг дөңнв.
Фондын негдгч марһанд Хальмг Танһчин 12 коммерческ биш бүрдәц орлцх. Февраль сарин 21-д дииләчнрин нерд нерәдҗ келх. Февраль сарин хөрн зурһанас авн хойрдгч марһанд орлцхар седҗәх улс документс орулҗ өгч чадҗана. Бату Хасиков таңһчин олна бүрдәцст эн кергт шунмһаһар орлцтн гисн дуудвр кев.
