Хальмг Таңһчин Правительствин Ахлачин негдгч дарук Боова Бадмаев болн таңһчин селǝнǝ эдл-ахун министр Санал Адьяев Приютна районур одад, тер района муниципальн бүрдǝцин селǝнǝ эдл-ахун предприятьмүдин мал яһҗ үвлзҗǝхинь шалһв.

Боова Бадмаев болн Санал Адьяев «Пик Плюс» агрофирм ООО-н, «Агроресурс» ООО-н, Кировин нертǝ СПК-н болн «Воробьёв А.И.» гидг КФХ-н мал өсклһнǝ хошмуд оч хǝлǝв. Тер хошмуд тал ордг хаалһсиг болн малын идгиг үнлв, малын хот бǝǝхинь медв. Приютна района муниципальн бүрдǝцин АПК-н ǝңгин һардач  Иван Цедеевин келсǝр, районд 32 миңһн бод мал, 108 миңһн хөн болн 500 мөрн үвлзҗǝнǝ гиҗ таңһчин Правительствин барин-цергллһн зǝңглҗǝнǝ.

Эн района эдл-ахуд мал сǝǝнǝр үвлзтхǝ гиһǝд, ут тоодан 45 миңһн тонн малын хот белдцхǝв. Тер тоод 25 миңһн тонн өвс, 20 миңһн тонн солом болн 1800 тонн буудя белдв. Теегт цасна көр 25 см күрчǝнǝ. Хǝǝлсн цасн һазриг сǝн кевǝр девтǝх, хөөннь урһц сǝǝнǝр урһх, малын идг сǝн болх гиҗ эдл-ахун һардачнр иткҗǝнǝ. Района цуг эдл-ахуд цас хурадг техник бǝǝнǝ, тегǝд мал өскдг хошмуд тал ордг хаалһсин бǝǝдл гем уга. Цасн икǝр орв. Района шишлң техниктǝ цергллһн цас хурахдан даңгин белн бǝǝнǝ. Приютна районд үвлзлһн сǝǝнǝр давҗана.