Әрәсән Президент Владимир Путин җил болһн Федеральн Хургт кесн Дуудвртан цуһараднь эрүл-мендин туслмҗ күргҗ өглһнǝ төрт, тер тоод орн-нутгт түрүн медико-санитарн дөң күрглһнд ик оньг өгв. Эн җил Әрǝсǝд келн-улсин төсвǝр фельдшерск-акушерск пунктсин сетин делгрүллһн төгсх зөвтǝ гиҗ эн герчлв. Медицинск көдлǝчнрт өдгǝ цагин оборудовань болн шулун интернет олзлад, ǝмтнд сǝн дөң күргх зөвтǝ гиҗ орн-нутгин толһач темдглв.

Давсн җилд «Эрүл-менд» гидг төсвǝр Хальмг Таңһчд тосхгдсн 12  фельдшерск-акушерск пункт апрель сарас авн эклǝд көдлх гиҗ ТАСС-т таңһчин эрүл-мендин министр Юрий Кикенов зǝңглв.

Министрин келсǝр, ода кергтǝ документс цуглулгдҗана: эмнлһнǝ учрежедьсин баланст орулх, хөөннь тедн медицинск оборудованяр теткгдх. Теднǝ кесгнь таарулсн герт бǝǝдг бǝǝсмн, тегǝд ода бǝǝрн йосд фельдшерск-акушерск пунктсин гермүдин өөрхнд бǝǝх һазрмудыг сǝн кецтǝ бǝǝдл һарһҗана, фельдшерск-акушерск пунктсин гермүдүр өөрдхдг хаалһс болн тротуармуд ясҗана.

2019 җилд Городовиковск района Шин Бǝǝдл селǝнд, Сарпинск района Новый селǝнд, Приютна района Октябрьский селǝнд, дǝкǝд Целинн района Лола, Джурак болн Бургуста селǝдт шин модульн фельдшерск-акушерск пунктс тосхгдв. Целинн района Овата селǝнд, Ик Буурла района Ут Сала селǝнд, Октябрьск района Мирный, Барун селǝдт болн Үстин района Татал селǝнд, Яшалтинск района Бага Тугтун селǝнд эвдрлһтǝ фельдшерск-акушерск пунктс сольгдв. Эн күслмүдин төлǝ 30 сай һар арслң йилһгдв.

«Давсн җил бидн 2018 җилǝс орхнь хойр холван ик фельдшерск-акушерск пунктс тосхвидн. 2020 җилд батлгдсн бооцаһар 44 сай арслң йилһгдх. Бидн 12 фельдшерск-акушерск пункт тосххар седҗǝнǝвидн», — гиҗ министр темдглǝд, ода регионд 89 ФАП бǝǝнǝ гиҗ немҗ келв.