Январь сарин арвн негнǝс авн 2020 җилин селǝнǝ эдл-ахун страхованин зура батлгдв. Тер документǝр АПК-н региональн бүрдǝцс селǝнǝ эдл-ахун көдлǝчнр страховань кетхǝ гиһǝд, тедниг мөңгǝр теткнǝ. Негдсн агрострахованин системǝр тер мөңгн олгдна. 2019 җилин декабрь сарин хойрт Әрǝсǝн селǝнǝ эдл-ахун Министерств тер документ батлв. Regulation.gov.ru. гидг порталд эн документ барлата.

Җил болһн иим зура батлгдна.

«Һазр эдлгч улс мөңгǝр дөңнлһнǝ үгцǝһǝр буудян, тосна, техническ, теҗǝлин, багцин культурмудыг, темсдиг болн боднцгиг, дǝкǝд олн җил бǝǝдг урһмлыг саглҗ чадх. Малчнр бод малмудыг, шовудыг, заһсыг, шовудыг, мөрдиг болн нань чигн селǝнǝ эдл-ахун малыг, зөгмүдиг теңгрин аюлас, түүмрǝс болн малын хальдврта гемǝс гетлхин төлǝ страховань кеҗ чадхмн. Заһс хулдлһна кергт орн нутгин дөңгǝр ярһа, бекр, җаал заһсдын страховань кеҗ чадх арһ учрх. Селǝнǝ эдл-ахун зурад урһмлын 82 зүс эс гиҗ баг орв, юңгад гихлǝ тедниг тǝрсн цагт теңгрин аюл учргдад, эс гиҗ урһмлын хальдврта гем тархагдад чигн бǝǝх, – гиҗ агростраховщик улсин Келн-ǝмтнǝ ниицǝнǝ  президент Корней Биждов цǝǝлһǝд келҗ өгв.

«2020 җилд Әрǝсǝн селǝнǝ эдл-ахун Министерств агрострахованиг мөңгǝр дөңнхин төлǝ 2,2 җува арслң йилһҗ өгх, кемр регионмуд улм ик мөңгнǝ дөң кергтǝ болҗана гихлǝ, тер дөң 4,2 җува арслң күртл өсх. Декабрь сарин 17-д болсн селвлцǝнд Әрǝсǝн селǝнǝ эдл-ахун Министерств эн хǝлǝцǝн медүлв», –гиҗ Биждов темдглв.

2019 җилин ноябрь сарин 30-д батлгдсн Әрǝсǝн правительствин шиидврǝр 2020 җилǝс авн 2024 җил күртл җирһлд хоршагдх, селǝнǝ эдл-ахун делгрлтин федеральн программд сольлһн орулгдв. Терүгǝр шин җилǝс авн һазр эдлгч улс урднь бǝǝсн һурвн мөңгǝр дөңнлһнǝ ормд («единая субсидия», «субсидия на повышение продуктивности в молочном скотоводстве» болн «несвязанная поддержка») компенсац өглһнǝ болн урмд өглһнǝ мөңгǝр дөңнлһн күрггдх.

Эн җил «компенсац өглһнǝ» мөңгǝр дөңнлһн 34 җува арслң күрх, «урмд өглһнǝ» мөңгǝр дөңнлһн 26,9 җува асрлң күрх.