Элстд, Диилврин паркд, «Формирование комфортной городской среды» гидг төсвǝр давулгдҗах көдлмш дуусҗ йовна. Декабрь сарин 16-д, сөөһǝр, паркд од дуралһад кесн бичкн архитектурн тосхлһиг эвдв. Балһсна паркд тиим һурвн одн бǝǝнǝ.

Паркд көдлмш күцǝҗǝх «ГАРАНТ-СТРОЙ» ООО-н бүрдǝцин мастер Родион Чалеевин келсǝр, манач Диилврин одна өңгтǝ тосхлһиг эвдсн ǝмтиг күцҗ чадсн уга.

Йисн өдр хооран ке-сǝǝхн бǝǝдл һарчах паркин һазрт тер бичкн архитектурн тосхлһн тǝвв. Эн өдрмүдт стела тал йовхин төлǝ кергтǝ давшурмуд деер тǝвǝтǝ оддыг ниицүлҗ тосхх бǝǝсмн гиҗ Чалеев келв. Тиигсн хөөн тедн асхн болсн цагт герлтх билǝ. Харм төрхд, һурвдгч «одыг» ясх кергтǝ болв. Мастерин келсǝр, тиим тосхлһн 200 миңһн арслң күрнǝ.

«Бидн цуг эн бичкн архитектурн тосхлт болн  композицс Диилврин далн тавн җилин өөнд нерǝдҗ тǝвҗǝнǝ. Балһсна ǝмтнǝ, ветеранмудын төлǝ тедн ик чинр зүүцхǝнǝ, — гиҗ Элст балһсна эдл-ахун болн административно-техническ шалһлһна Заллтын сǝн бǝǝдл һарһлһна ǝңгин һардач Елена Урванцева келв. –Тиим му йовдл һарһсн улсыг олҗ авх кергтǝ. Ода тер одыг яһҗ ясҗ болхин тускар ухалҗанавидн»

Урванцеван зǝңглсǝр, декабрь сарин 25 күртл паркд күцǝгдҗǝх көдлмш төгсх зөвтǝ. Ода чигн кех көдлмш бǝǝнǝ. Панрмуд болн хашалдг юмс тǝвх кергтǝ. Энүнǝ келсǝр, «Безопасный город» гидг программар тенд болн правительствин Герин өөр видеокамермүд тǝвгдхмн.

Декабрь сарин 16-д, сөөһǝр, Элст балһсна 7-гч микрорайонд бǝǝх Диилврин Паркд таньгддго улс металлар кесн конструкц эвдв гисн зǝңг Элст балһсар Әрǝсǝн МВД-н Заллтд ирв гиҗ Хальмг Таңһчар дотр-дундын керг-үүлдврин Министерствин барин-цергллтд батлҗ келв. «Полицин патрульно-постовой цергин көдлǝчнр түргǝр тиигǝрǝн һарч йовад, буру йовдл һарһснд харлгдҗах хойр кү бǝрҗ авв.

Өдгǝ цагт дотр-дундын керг-үүлдврин бүрдǝц бǝргдсн улс тер му йовдл һарһсн аль угаһинь медҗ авчана.

Эн йовдлар хǝлǝвр давулгдҗана, кедү һару һарһсинь медҗ авгдҗана, эн кергин цуг учринь илдкгдҗǝнǝ», — гиҗ ведомствин барин-цергллт зǝңглв.

Хальмг Таңһчин Толһач Бату Хасиков соцсетьд эврǝннь халхдан эн буру йовдлын тускар эврǝ ухан-тоолвран бичв.