Бөк бǝрлдǝһǝр орн-нутгин цуглулсн командын ах тренер, спортар нарт-делкǝн классин мастер Б.В. Боктаевд «Әрǝсǝн ачта тренер» гидг күндтǝ нер зүүгдв. Әрǝсǝн Федерацин спортын Министерствин сайтд энүнǝ тускар герчлҗǝх заквр барлата. Министр Павл Колобков тер закврт һаран тǝвв.

«Тренер күүнд энтн хамгин өөдǝн чинртǝ ачлвр болна. Би энүг күцв, — гиҗ  «Теегин зǝңгд» Басанг Боктаев келҗ өгв.— Ик байрта бǝǝнǝв. Арвн җилин туршарт тренер болҗ көдлҗǝнǝв».

Энүнǝ келсǝр, терүнд хөөннь ачлврнь бǝрүлҗ өгх. Эн Әрǝсǝн ачта тренер гидг темдгǝр болн тер темдгин цаасар ачлгдх.

Басанг Владимирович нертǝ спортсменмүд – ахнр Мингиян болн Санал Семеновихнǝ тренер болна. 2013 җилǝс авн эн бөк бǝрлдǝһǝр орн-нутгин цуглулсн командт көдлǝҗǝнǝ. Б.Боктаев 55 болн 60 киил татдг спортменмүд дунд болдг нарт-делкǝн марһаст спортсменмүдиг белднǝ. Боктаевин тоолврар, энүнǝ белдсн спортсменмүд сǝн күцǝмҗс бǝрҗ йовна. Нидн җил терүнǝ белдсн спортсмен Европин чемпион болв. Эн җил Мордовия һазрас спортсмен Сергей Емелин 60 киил татдг улсин дунд болсн марһанд орлцад, делкǝн чемпионатд цаһан мөңгнǝ мөрǝһǝр ачлгдад, 2020 җилд Токиод болх Олимпийск нааддт орлцх путёвк шүүв.

Басанг Боктаевин келсǝр, эн спортсмен болн тренер болснд терүнǝ эк-эцкнрин ик ач-тус бǝǝнǝ.

«Эк-эцкм нанд бийдм шүүвр кех арһ өгв. Арвн хойртадм Москвад олимпийск көрңгин школд сурх арһ учрхла, би эврǝн эн туст ю кехǝн медǝд, кергтǝ шүүвр кевв. Эк-эцкм нанд иигҗ келв: тенд сурһуль сурхар седҗǝхлǝ, тиигǝрǝн йов. Тегǝд би Әрǝсǝн хотл балһсур йовв. Тенд мини ах Виктор сурһуль сурчала», — гиҗ Б.Боктаев келв.

Ода Виктор Боктаев нертǝ спорстмен, бөк бǝрлдǝһǝр Хальмг Таңһчин цуглулсн командын тренер.

«Спортсмен болхд нанд мини багшнр ик нөкд болцхав. Терүнд мини түрүн тренер Геннадий Александрович Левиновин ик ач-тус бǝǝнǝ Ик Буурла района бичкдүдин, уйн баһчудын спортын школд энүнǝ һардҗасн секцд би нǝǝмтǝһǝс авн орв. Минь тер нанд бөк бǝрлдһǝр түрүн сурһуль өгв. Нанд иим күндтǝ нер өгчǝх заквр батлсна хөөн мини багш намар омг авчах. Эн бийнь Әрǝсǝн ачта тренер. Ик Буурла района ДЮСШ-н директор Олег Дмитриевич Коржуевд ханлт өргҗǝнǝв. Тер бас мини болн мини ахин төлǝ дала юм кев.

Олн ǝмтн намаг дөңгнсн билǝ, эдн ода чигн  нанд нөкд болад бǝǝнǝ. Би эднд ханлтан өргҗǝнǝв».

Басанг Владимировичин темдглсǝр, мана таңһчд ǝмтн бөк бǝрлдǝһǝр икǝр соньмсна.

«Хальмг Таңһчд бөк бǝрлдǝн сǝǝнǝр делгрҗǝнǝ. Эн халхар даңгин өөдǝн күцǝмҗс бǝргднǝ. Дорас сǝн баһ үй өсҗ йовна. Т.Л. Балдашиновин нертǝ бǝрлдǝнǝ Академин тренер-багш болад, би энүнǝ тускар сǝǝнǝр медǝд келҗǝнǝв. Мана тренермүд йир сǝн, өөдǝн мергҗлттǝ специалистнр көдлнǝ. Тегǝд манад дǝкǝд чигн олимпийск чемпионмуд һарад бǝǝх гиҗ тоолҗанав», —гиҗ Басанг Боктаев ухан-тоолврарн хувалцв.