Октябрь сарин 23-с авн октябрь сарин 30 күртл ǝмтиг көдлмшǝр тетклһнǝ церглтин бүрдǝцд көдлмш уга үлдсн улсин то 0,4 процент күртл өсв, 644,9 миңһн күн болв. Энүнǝ тускар Әрǝсǝн күч-көлснǝ Министерствин сайтд зǝңглгдҗǝнǝ.

Долан хонгин йовудт 24 регионд көдлмш уга бǝǝсн иргнмүдин то баһрв.  Еврейск автономн областьд, Брянск, Орловск, Тамбовск областьмудт, Севастополь балһснд, Алтайд, Ингушетияд, Карачаево-Черкессияд, Краснодарск болн Хабаровск краймудт көдлмш уга бǝǝсн улсин то хамгин икǝр баһрв.

51 регионд болхла көдлмш уга үлдсн ǝмтнǝ то икдснь темдглгдҗǝнǝ. Магаданск, Новгородск, Новосибирск, Омск, Сахалинск, Томск областьмудт, Алтайск крайд, Хальмг Таңһчд, Марий Элд, Мордовияд тиим улсин то хамгин ик болв.

Ненецк, Ханты-Мансийск, Чукотск, Ямало-Ненецк автономн округудт, Хакасия, Ивановск, Костромской, Ленинградск, Смоленск, Тульск областьмудт көдлмш уга улсин то тер кевтǝн бǝǝнǝ.

Октябрь сарин 30-д Әрǝсǝһǝр көдлмш уга ǝмтнǝ то 0,9 процент күрв. Көдлмшǝр теткдг церглтин бүрдǝцд ǝмтиг көдлмшǝр теткхǝр бǝǝх улс 1,66 сай эрлһ орулҗ өгх зөвтǝ.