Ингушетьд негдсн бөк-бәрлдәһәр давдг FIGHT NIGHTS гидг марһаг лавта  республикин тогтсна 25 җилин өөнд нерәдҗ бүрдәх төрәр Ингушетин Толһач

Юнус-Бек Евкуров болн кикбоксингәр нарт-делкәд олн дәкҗ дииләч болсн Бату Хасиков күүндв. Энүнә тускар теднә региона толһачин сайтд зәңглгдҗәнә.

Эднә республикд спортивн объектмүд түргәр тосхгдҗахиг туурсн спортсмен темдглв. Дәкн энүнә немҗ темдглсәр, Ингушетьд Ар Кавказин федеральн округин негдсн бөк-бәрлдәһәр марһа давуллһн чинртә спортивн керг-үүлдвр болхмн.

Ингушетин Толһачин келсәр, негдсн бөк-бәрлдәһәр давдг иим дүңгә марһас келн әмтнә хоорндк хәрлцәг батрулхмн, терүг өөдән кемҗәнд бүрдәлһн бас чигн спортсменмүдт байн дамшлт хоршаҗ авхд дөң болхмн.

«Оздо» гидг бөкнриг клубин үрврәр Бату Хасиков уйн наста спортсменмүдт, тренермүдт, ММА- негдсн бөк-бәрлдәна бәәрн федерацин элчнрт мастер-класс давулв гиҗ «Ингушетия» интернет-газет зәңглҗәнә.

Нер һарсн спортсмен эднд бөк-бәрлдәнә туста бәрлдә үзүлв, тер мет бийиннь күцәмҗиннь нувчар хувалцв.

«Кемр спортар соньмсҗахлатн, түрүләд диг-дарата болх кергтә. Цаглань залд ирҗ, седклән тәвҗ көдлхмн болн тренерин селвгинь эрк биш соңсхмн», — гиҗ Бату Хасиковин келсиг издание бичҗәнә.

Энүнә нааран ирлһн олн җилә хамцу үүлдврин эклц, тер мет удлго регион бөк-бәрлдәнә цутхлң болхмн гиҗ бәәрн журналистнрт өгсн интервьюд Хасиков келв.

 

Зургнь: ingushetia.ru, gazetaingush.ru