Танһчин Правительствин хургин Ик залд А.О.-Г. Цебековин нертǝ Хальмг Танһчин Орн-нутгин олар дууллһна дууч Айса Брюгидикован концерт болв. Элстд бǝǝдг баһ наста дуучин сǝǝхн дунь мана таңһчин ǝмтнǝ болн Әрǝсǝн талдан балһсдын улсин зүркиг авлв.

Айса бичкдүдин садт орҗаһад, түрүн болҗ тǝǝз деер һарсмн. Школд сурсн цагт билгин марһаст орлцад, күцǝмҗс бǝрҗ йовла. Элстин 20-гч школд йисдгч класс төгсǝҗǝһǝд, эн җирһлǝн келн-улсин дуунла залһлдулхан сǝǝнǝр медв.

2008 җилд Айса Петр Чонкушовин нертǝ Элстин искусствин училищд орв. Әрǝсǝн Федерацин ачта артистк Антонина Мукаева, Әрǝсǝн Федерацин искусствин ачта үүлдǝч, Гнесиных нертǝ Әрǝсǝн көгҗмин академин профессор Светлана Игнатьева, Әрǝсǝн болн Хальмг АССР-ин искусствин ачта үүлдǝч Анатолий Цебеков Айсан багшнр болад, җирһлднь сурһмҗ өгнǝ.

Искусствин училищ төгсǝсн хөөн эн Гнесиных нертǝ Әрǝсǝн көгҗмин Академд орв. Тенд Айса сурһулян, билгǝн улм өөдлүлв.

Москва балһснас Элстүр ирсн хөөн Айса Хальмг орн-нутгин филармоньд одад, көдлмшин тускар сурв. Тенд көдлдг улс билгтǝ, нег һазра күүкиг байртаһар филармоньдан авв. Дууч җилин туршарт А.О.-Г. Цебековин нертǝ олар дууллһнд Ольга Сердюкован һардврт көдлҗǝнǝ. Эн орс, хальмг болн авторин, советск көгҗмчнрин дуд, романс дуулна.

Эн күүкнǝ санан көгҗмлǝ залһлдата. Айса җил болһн Хальмг Таңһчд келн-улсин дуд дуулдг дуучнр олн болад бǝǝтхǝ гисн санан седклдǝн зүүҗǝнǝ.

«Нанд нег бичкн седклин санан бǝǝнǝ – би йир сǝǝнǝр төрскн келǝн медхǝр седҗǝнǝв. Хальмг болһн иим күслтǝ болад, терүг күцхǝр зүткхлǝ, йир сǝн болх билǝ. Һанцхн иим кевǝр мана таңһчин ǝмтн эврǝ тууҗан медҗ чадх», — гиҗ Айса келв.

Айса дару-дарунь өргн теегүрн һарч йовна. Тенд күүкн цевр аһар киилǝд, теегǝн хǝлǝһǝд, байр-бахта бǝǝнǝ. Төрскн һазр дуучд чидл өгнǝ.