Хальмг Таңһчд Әрәсән МЧС-ин Һол залврин сүүр деер 2016 җилин үүлдврин ашан болн 2017 җилд тәвҗәх күслмүдин төрмүд хәләгдв. Тер мет урдаснь саглуллһна болн зеткртә аюлас харслһна Негдсн государственн систем яһҗ көдлснә төр бас шинҗлгдв.

Сүүрт Хальмг Таңһчин Толһач Алексей Орлов, таңһчд үүлддг Әрәсән Президентин күцц зөвтә элчин аппаратын федеральн инспектор Александр Беляев, министерствсин болн ведомствсин, федеральн йосна органмудын бәәрн әңгүдин элчнр, муниципальн бүрдәцсин толһачнр орлцв.

Хальмг Таңһчд Әрәсән МЧС-ин Һол залврин һардач Андрей Колдомов ашлгч илдклдән таңһчин түүмр унтрачнрин болн әм харсачнрин күцәмҗиг темдглҗәх то-дигин тускар келв. Тиигәд энҗл зеткртә йовдлмуд 80% баһрв, бас чигн түүмр болдг болн тег шатдг йовдлмуд, түүмрт әмнәсн хаһцсн улсин то чигн баһрв. Нег үлү улсин әмиг харссна йовдлмуд улм икдв.

Үстин болн Яшкулин райодт хамгин сән аштаһар көдлв, зуг Приютна, Ик Буурла райодт болн Элстд түүмр олар учрдг болв гиҗ темдглв. Ик Буурла райодт, һундл төрхд, хойр күн түүмрт сәәһән хәәв. «Гражданск харслтын Цутхлң» гидг таңһчин КУ бүрдәлһн һарчах җилин һол йовдл болв гиҗ эн келв. Энүнә келсәр, Яшалтан района Красномихайловск селәнд түүмр унтралһна пост түрүн болҗ бүрдәсмн. Терүнд йисн күн көдлҗәнә, нег түүмр унтрадг көлгн бәәнә. Зуна цагт эдн 6212 күн бәәдг зурһан селәниг түүмрәс харсна.

«Хальмг Таңһчд Әрәсән МЧС-ин Һол залвр лавта олн әмтнә әм харссна, түүмр унтрасна, хаалһд учрдг зеткртә йовдлас харссна халхар җил болһн сән көдлмшин аш үзүлнә. Нааран ирсн учрар цуг таанрт ханлтан өргҗәнәв, юңгад гихлә таанр олн әмтнә эрүл-мендинь харсҗанат, төвкнүн бәәдл тогтаҗанат. Зеткртә йовдлмуд баһар учрхиг Олн Деедсәс сурҗанав», — гиҗ Алексей Орлов келв.

Андрей Колдомов сүүриг ашлад, 2016 җилин хөөн Әрәсән МЧС 2017 җилиг гражданск харслтын Җил гиҗ зарлҗана гив.

Болдурина Елена

Зургнь: glava.region08.ru