Хальмг Таңһчин Толһач Алексей Орлов ǝмтиг усар тетклһнǝ төрǝр хург давулв. Терүнд Хальмг Таңһчин Правительствин Ахлач Игорь Зотов, терүнǝ негдгч дарук Сергей Бадмаев, ЖКХ-н болн энергетикин министр Нелли Ткачева болн нань чигн таңһчин правительствин гешүд орлцв.

Левокумск  булгас мана таңһчур ус орулһна төриг шулуһар хаһлх кергтǝ гиҗ А. Орлов темдглв. Таңһчин Толһач Улсин Хуралын депутатнрт дуудвр кехлǝрн, эн усна төр дегǝд удан хаһлгдҗахин тускар келǝд, таңһчин һардачнр бийснь терүг хаһлад, ǝмтиг усар тетх гисн герчллһ кев.

А. Орлов моһа сарас авн эн төр хаһлгдҗахин тускар келв. Үлгүрнь, Ик Буурла селǝнǝ ǝмтн ǝмтǝхн усар теткгдв. Эн өдрмүдт Целинн района Вознесеновк селǝнүр ус оруллһна көдлмш кегдҗǝнǝ. Аршан болн нань чигн һазрмудыг сǝн усар теткх күсл тǝвгдҗǝнǝ. Эн җилин һаха сарин нег күртл Элстд бǝǝдг улсиг сǝн усар теткх зөвтǝвидн гиҗ Таңһин Толһач герчлв.

Эн хургин йовудт усна төрлǝ залһлдата сурврмуд шинҗлгдв.

Хургин хөөн Правительствин Ахлач Игорь Зотов Ик Буурла ус гүүдг тотвр таңһчин хазнд өггдҗǝхин тускар зǝңглв.

«Усна төрǝр көдлмш кегдҗǝнǝ, — гиҗ И. Зотов темдглв. – Хальмг Таңһчин Толһач Элстд бǝǝдг ǝмтиг Левокумск булгас усар теткх күслтǝ. Терүг күцǝхин төлǝ даалһврмуд өггдсн бǝǝнǝ, ода тедниг күцǝхмн».