Һаха сарин 9-д Хальмг Таңһчд Улсин Хуралын (Парламентин) депутатнриг суңһх. Дǝкǝд тер өдр Ик-Буурла района муниципальн бүрдǝцин (РМО) 3-гч тойгта суңһлһна округин 4-гч дуудврин (созыв) Хургин, Приютненск РМО-н 2-гч тойгта суңһлһна округин 4-гч дуудврин Хургин, Яшкульск РМО-н 2-гч тойгта суңһлһна округин 4-гч дуудврин Хургин, Ик Чонса селǝнǝ муниципальн бүрдǝцин депутатнрин Хургин депутатнр суңһгдх.

2018 җилин туула сарин нег шинлǝ кесн ашлврар Хальмг Таңһчд 210911 суңһач бǝǝнǝ.

Хальмг Таңһчин суңһлһна комиссин ахлач Александр Дикаловин келсǝр, мана таңһчд суңһврт белдлһнǝ болн терүг давуллһна көдлмшт 14 территориальн суңһлһна комиссь (ТИК) болн 251 участкин суңһлһна комиссь (УИК)  орлцх, нег УИК таңһчин больницд көдлх. Мөчн сард таңһчин суңһлһна комиссьмудт көдлх ǝмтиг шинǝс шүүв.

Хальмг Таңһчин Улсин Хуралд (Парламентд) 27 депутат суңһгдх.

Ноха сарин 7-д Хальмг Таңһчин суңһлһна комиссин шиидврǝр «ПАТРИОТЫ РОССИИ» КРО ПП (16 кандидат), Хальмг Таңһчд «Гражданская Платформа» РО ПП (6 кандидат), Хальмг Таңһчд СПРАВЕДЛИВАЯ РОССИЯ РО ПП (21 кандидат), КРО ПП ЛДПР (25 кандидат); КОММУНИСТИЧЕСКАЯ ПАРТИЯ КОММУНИСТЫ РОССИИ КРО ПП (37 кандидат); Хальмг Таңһчд «Российская экологическая партия «Зелёные» РО ПП (5 кандидат); КРО ПП «КПРФ» (21 кандидат); «ЕДИНАЯ РОССИЯ» КРО ВПП (39 кандидат); Хальмг Таңһчд «РОДИНА» РО ВПП (17 кандидат) таңһчин кандидатмудын спискудт орв.

Өцклдүр, ноха сарин 7-д, Хальмг Таңһчин суңһлһна комиссь Хуралын депутатнрин суңһврт 210911 суңһврин бюллетень олзлгдхинь, тер бюллетеньмүд ямаран дүрстǝ болх зөвтǝһинь батлв.

«Ноха сарин 11-с авн һаха сарин нǝǝмнǝ 00.00 час күртл суңһврин өмн давулгдг цǝǝлһлт (агитац) давулҗ болҗана.

Таңһчин Хуралын (Парламентин) суңһврин туск информационн материалмудта  34 тоот (билборд, баннер болн нань чигн тоот) кегдв. Тедниг таңһин цуг райодар илгǝх. Дǝкǝд Элстин цутхлңд бǝǝх рекламин экранд, «Магнит» гипермаркетин зданьд, олна транспортмудт Хуралын  суңһврт орлцтн гисн дуудврта видеороликуд үзүлгдх. Иим видероликуд ФГУП ВГТРК КГТРК-н телерадиоканалар, «Хамдан Калмыкия» телеканалар үзҗ болхмн.

Ноха сарин 15-д  Хальмг Таңһчин суңһлһна комиссин 8 (84722) 4-05-73, 4-05-76 гидг телефона тойгудар ǝмтн җиңнүлҗ чадҗана. Ноха сарин 10-д болхла, ǝмтн эврǝ ТИК-ур җиңнүлҗ чадх», — гиҗ Хальмг Таңһчин суңһлһна комиссин ахлач темдглв.

А. Дикаловин келсǝр, 21 суңһврин участкд суңһврин бюллетеньмүд шинҗлдг комплекс (КОИБ) олзлгдх.

Суңһвр болх цуг һазрмудт төмр хǝǝдг юмс (металлодетектор), 37 төмр үздг рам (рама-металлодетектор) олзлгдх.

Алекандр Дикаловин темдглсǝр, 14 ТИК-д видео шинллтын болн трансляц  кедг юмс тǝвгдх, ТИК-ас «Выборы» ГАС-ур трансляц кегдх.

Эн өдрмүдт территориальн суңһлһна комиссьмуд суңһачнрин спискуд шинҗлҗǝнǝ, дǝкǝд тедн бǝǝрн эврǝн үүл-төрǝр һарлһна бүрдǝцслǝ (органы местного самоуправления), таңһчин МЧС-ла, МВД-ла суңһвр давулгдх ормд бүрткҗ хǝлǝҗǝнǝ.

Мана таңһчд суңһврин кампань федеральн болн региональн закврин некврлǝ ирлцҗ, юм нуулго давтха гиһǝд Хальмг Таңһчин суңһврин комиссь цуг арһ-чидлǝн ǝрвлго көдлҗǝнǝ гиҗ А.Дикалов темдглв.