Кировин болн Хрущевин нертǝ уульнцсин хаалһсиг ясҗана. Келхд, Кировин нертǝ уульнцд хаалһин хату девскр сольгдх, ǝмтн йовдг җим хаалһ, машид зогсдг талвңгуд, усн гүүдг орм, тагт, һаза шатдг шам ясгдх, автобусмуд зогсдг орм, ǝмтн хаалһ һатлдг юмс кегдх, светоформуд бас чигн тǝвгдх. Канализационн коллектор хаалһин  дорас һарһгдх. Эн цуг көдлмш давулхин төлǝ таңһчин болн балһсна бюджетǝс (мөңгнǝ көрңгǝс) 140 сай шаху арслң йилһгдв.

Хрущевин нертǝ уульнцд асфальтин хату девскр сольгдх, ǝмтн йовдг җим хаалһ, усн гүүдг орм, һаза шатдг шам, автобусмуд зогсдг орм, светоформуд ясгдх. Эн көдлмшин төлǝ зун сай һар арслң йилһгдх.

Элстин хаалһс ясруллһна көдлмш 2016 җилǝс авн эклҗ кегдҗǝнǝ гиҗ балһсна администрац темдглв. Хойр җилин туршарт 25,5 дууна хаалһ ясгдв.