«Ахтер Ферлаг» (Achter Verlag) гидг немшин hарhач «Медгдәд уга орн-нутгудын Са » гидг нертә дегтр hарц барас hарhҗана.

Терүнә күслнь ― немшин келәр hардг классическ справочникудт, үлгүрнь, «Бедекер» (Baedecker), эс орсн орн-нутгудын тускар бичлhн. Эн hарц Молдова Республикәс эклв, хойрдгчнь хальмг hазрт тусхагдххмн.

Тер немшин hарhачас көдлмшчнр Элстүр ирхәр бәәхин тускар Мюнхенд (Германьд) бәәдг мана нег hазра күн, филологин номин доктор Ольга Зеесинг зәңглв.

«Ахтер Ферлаг» гидг немшин hарhачин түүрвәчнр Вольфганг Орианс (Wolfgang Orians) болн Андреас Залевски (Andreas Salewski) 22 июльд ирх, эдн энд hурвн долан хонгт бәәхмн.

Хальмгин ке-сәәхн hазрин, энд бәәдг келн-улсин тускар эн дегтрт келгдхмн. Дегтрин түүрвәчнрин темдглсәр, эн дегтрәс иштә мана таңhчин тускар медҗ болҗана, бас чигн шин hазр үзхәр седҗәх зуульчнрт селвгүд терүнд өггдхмн.

Эн дегтр 2019 җилин моhа сард болх Лейпцигин нарт-делкән дегтрин яармд тәвгдхмн.