Хальмг Таӊһчин правительствин тогтаврас иштә таӊһчд эдл-ахун үүлдврән күцәдг эд-бод келһнә предприятьмүдт олзлсн электрокүчнә мөӊгнә зәрм хүвинь даӊцалһнд бәәрн бюджетәс субсидь йилһҗ өгхмн.

Таӊһчин правительствин барин цергллтин зәӊглсәр, «2013-2020 җилмүдт Хальмг Таӊһчин экономическ делгрлт болн инвестиционн бәәдл ясруллһн» гидг госпрограммин «2014-2020 җилмүдт Хальмг Таӊһчд баһ болн дунд бизнесин делгрлт» гидг подпрограммар  марһана ашар эн субсидь йилһҗ өггдхмн.

Тер мет субсидь авх предприятьмүдт шишлӊ неквр тәвгдхмн. Үлгүрнь, предприять алвна, даатхлһна мөӊгин, ялын болн нань чигн халхар өрн уга болх зөвтә, дәкәд предприять реорганизацин, эс гиҗ үүлдврән ууруллһна эс гиҗ банкротствин бәәдлд тусх зөв уга болҗана.