Эндр Хальмг Таӊһчин Толһач Алексей Орлов таӊһчин эмнлһнә учрежденьст «Түргн дѳӊ» күрглһнә шишлӊ кѳлг бәрүлҗ ѳглһнә байрин керг-үүлдврт орлцв. Сән авъяст тохрсар байрин керг Элст балһсна цутхлӊд «Пагода Семи дней» гидг сойлын комплексин талвӊд болв.

Эндр мана таӊһчин эмнлһнә учрежденьст бачм дѳӊ күрглһнә 110 кѳлгн бәәнә, теднәснь 63 машин 5 җиләс даву эдлврт бәәһәд хуучрв. 2016 җилд Хальмг Таӊһч 24 шишлӊ кѳлг авсн билә, теднәснь 7 кѳлгн федеральн бюджетәс йилһгдсн мѳӊгәр хулдҗ авгдв, 17 машин бюджетн биш мѳӊгәр хулдҗ авгдсн билә. 2017 җилд РФ-н правительствин зааврас иштә федеральн бюджетәс йилһгдсн мѳӊгәр 15 кѳлгн мана таӊһчд йилһгдсмн. КТК-Р буйнч седклин программар «В» классин бачм дѳӊгин 8 маши йилһҗ ѳгв, таӊһчин эрүл-менд харлһна министерств бюджетн биш мѳӊгәр «А» классин 1 кѳлг хулдҗ авв.

Эн ѳдрмүдт Элстүр «В» классин дәкәд 10 шишлӊ кѳлгн  ирв. Хальмг Таӊһчин Толһач  Алексей Орлов «Катастрофин медицинә таӊһчин Цутхлӊ» учрежденьд 3 машинә, «Бачм дѳӊгин станц» -2 кѳлгнә түлкүрмүд бәрүлҗ ѳгв. Тер мет «Аптечн заллт» учреждень, Октябрьск, Городовиковск, Кѳтчнрә, Целинн болн Лаганя райодын больницс шишлӊ машитә болв. Дәкәд Алексей Орлов Яшалтан района больницин ах эмчд мобильн цифровой флюорографин, Приютна района больницин ах эмчд болхла рентген-аппаратын документс бәрүлҗ ѳгв.

Таӊһчин эмнлһнә учрежденьсин кѳдләчнрин нерн деерәс Яшалтан ЦРБ-н фельдшер Алена Горелова болн Кѳтчнрә ЦРБ-н фельдшер Зинаида Кандуева таӊһчин  Толһачд, правительствд ханлтан ѳргв.