Эндр Москвад ВДНХ-д «Негдсн Әрәсә» партин XVII съезд болҗана. Терүнә һоллгч төрнь – 2018 җилин мартын 18-д Әрәсән Президентин суӊһвр. Хальмг Таӊһчин Толһач, партин Деед советин гешүн Алексей Орлов РФ-н орн-нутгин Хүүвин бюджетин болн алвна комитетин ахлач Андрей Макаров һардсн «Экономика роста и благосостояния» гидг секцин көдлмшт орлцв. Эн секцд  РФ-н финансин министр Антон Силуанов, Әрәсән экономическ делгрлтин министр Максим Орешкин, РФ-н Тооһин палатын ахлач Татьяна Голикова илдкл кев.

Хальмг Таӊһчас съездин көдлмшт Хальмг Таӊһчин Улсин Хуралын (Парламентин) Ахлач, «Негдсн Әрәсә» партин КРО-н сегләтр Анатолий Козачко, парламентин спикерин негдгч дарук, Улсин Хуралд «Негдсн Әрәсә» партин фракцин һардач Саглар Бакинова, таӊһчин сойлын министр Хонгор Эльбиков, Элстин администрацин толһач Окон Нохашкиев, региональн исполкомин һардач Эльвина Хабунова, съездин делегатнр – Байрта Мукаева болн Хальмгин Герой, депутат Валерий Болдырев, региональн әӊгин сегләтрин дарук, ЭГС-ин депутат Сергей Сухинин орлцҗана.

Ут тоодан съезд 2500 орлцач болн гиич орлцҗана, теднәснь Әрәсән 85 региональн әӊгин 455 делегат, министерствсин болн ведомствсин һардачнр, орн-нутгин Хүүвин депутатнр, регионмудын күцәгч болн зака үүдәгч органмудын элчнр, региональн политсоветмудын сегләтнр, экспертн болн номин сообществсин элчнр. Тер мет эн съездд федеральн, региональн болн һазадын орн-нутгудын СМИ-н миӊһ һар журналист аккредитац авсн бәәнә.

Съездин түрүн өдр федеральн министрмүдин орлцатаһар «Качество государства», «Экономика роста и благосостояния», «Социальная политика», «Умная сила и культурное лидерство», «Здоровое будущее», «Быть хозяином в собственном доме» болн «Аграрная сверхдержава» гидг 7 дискуссионн площадк үүлдв. Терүнд эн җил кесн көдлмшин аш диглгдв, ирх җилд кех-күцәх кергүд батлгдв.

«Экономика роста и благосостояния» гидг площадкин модератор Андрей Макаровин темдглсәр, партин программ ямр кевәр күцәгдҗәхиг шинҗлҗ, ямаран сольвр терүнд орулх кергтәһинь йилһҗ авх кергтә. РФ-н финансин министр Антон Силуановин келсәр, хойр эркн чинртә төр тәвгдсн билә. Эннь әмтнә бәәхтә җирһл тетклһн болн экономикин босхмҗ. Дааврта һардачин темдглсәр, ода әмтнә җирһл ясрҗана, җалв өсҗәнә. Экономическ делгрлтин министр бас сән талагшан болсн хүврлтсин тускар келв.

Эн площадкин көдлмшин тускар парламентин спикерин негдгч дарук, Улсин Хуралд «Негдсн Әрәсә» партин фракцин һардач Саглар Бакинова ухан-тоолврарн хувалцв.

— Эндр съездин түрүн өдр болв, долан площадк үүлдв.  Терүнд мана региона әмтиг үүмүлҗәх төрмүд хәләгдв, тер мет бюджетмүд хоорндк хәрлцәнә төр бас босхгдв. Субъектмүдт бюджетн кредит авлһн, государственн программс күцәлһн бас хәләгдв,- гиҗ Саглар Бакинова келв.

Хальмгин элчнр талдан площадксин көдлмшт орлцад, терүнд хәләгдсн төрмүдин тускар бас хувалцв. Тиигәд «Качество госурства» секцд Анатолий Козачко, «Аграрн сверхдержава» секцд Валерий Болдырев, «Умная сила и культурное наследство» секцд Хонгор Эльбиков орлцв.

Съездин түрүн өдр «Негдсн Әрәсә» партин суӊһврин өмнк программ күцәлһиг бүртклһнә комиссин сүүрәр төгсв. Терүг партин Ахлач, премьер-министр Дмитрий Медведев давулв. Маӊһдур болх пленарн сүүрт Дмитрий Медведев партин һоллгч төрмүдин туск илдкл кехмн. Тер мет партин Деед болн Генеральн советин хань шинрүлгдхмн, уставд сольвр орулгдхмн. Тер өдрин бийднь шинрүлгдсн партин Генеральн советин сүүр болхмн.