«Маленькие Эйнштейны» клубин болн «Академия будущего Профессориум» негдлтин бичкдүд Краснодар балһснд болсн «Робофест-Юг» гидг роботехникин фестивальд диилвр бәрв.

Краснодарск болн Ставропольск краймудын, Ростовск болн Волгоградск областьмудын, Хальмг Таӊһчин болн Чеченск республикин элчнр, ут тоодан 140 команд (400 шаху орлцач) зурһан зөрүллтәр болсн марһанд орлцад, билг-эрдмән үзүлв.

«Маленькие Эйнштейны» клубин барин цергллт зәӊглсәр, ах команд (9-12 наста бичкдүд) «Hello, Robot» гидг марһанд орлцв. Алсу Брантова, Егор Михайлов, Очир Манцаев, Дана Бондарева, Артем Кукаев, Роман Милиев, Артен Бадма-Халгаев, Егор Шаров болн Эдуард Хвостиков командын ханьд орв. Күүкд-көвүд күцәмҗтәһәр марһанд орлцад, ЮФО-н сән гисн арвн командын ханьд тусв.

7-8 наста бичкдүдин команд болхла эврәннь категорьтан диилвр бәрв. Уйн наста инженермүд Виктор Лиджеев, Иляна Манджиева, Давид Атхиров, Дмитрий Будыков болн Арсений Кошелев «Лучшая новаторская идея» номинацд диилв. «Профессориумин» команд «Самое сложное проектное решение» гидг номинацд  Junior FIRST LEGO LEAGUE гидг халхд бас диилвр бәрв. Эн командын ханьд Валерий Мамутов, Арлтан Цедеев, Тагир Кекленов, Бадма-Даяна Халгаева болн Олег Евенко билә.

Эн фестивальд диилвр бәрсн йовдл уйн наста инженермүдт «Робофест-Москва-2018» гидг Цугәрәсән фестивальд орлцад, Хальмг Таӊһчин нер харсх зөв өгв. Эн керг-үүлдвр Москвад ирх җилд март сард болхмн.