Ростовск областин Вешенская станицд «Лесной ярус» гидг эстафет-викторин болв. Эн керг-үүлдвр М.Шолоховин нертә музей-заповедникин болн Донск государственн аграрн университетин Новочеркасск инженерн-мелиоративн институтын севдәрәр бүрдәгдв. Экологическ марһанд Әрәсән Өмн үзгин федеральн округин регионмудын болн Воронежск областин 16 команд орлцв.

Таӊһчин йиртмҗин көрӊгин болн эргндк йиртҗиг харлһна министерств зәӊглсәр, мана команд Троицк селәнә Г.Жуковин нертә дундын школын болн Элст балһсна 15-ч тойгта дундын школын  сурһульчнрас тогтв. Эн сурһулин заведеньст Хальмгин ө-шуһу модна эдл-ахун дөӊгәр школьн лесничеств үүлдҗәнә.

Марһана йовудт сурһульчнр олн зүсн төрәр даалһврмуд күцәв. Эдн моддын, ө-шуһу моддт бәәдг шовудын болн нань чигн төрәр медрлән үзүлв. Эн марһанд түрүн болҗ орлцсн Герензел Харцхаева болнАлександра Бойкова (Троицкас), Айтана Шиханова болн Давид Кодлаев (Элстәс) гүн медрл үзүләд, I орм эзлв. Хальмгин команд I девсӊгин Дипломар, сертификатар болн белгүдәр ачлгдв. Келхд, марһана дииләчин сертификат профильн деед болн шишлӊ дунд сурһуль-эрдмин учрежденьд орҗ сурхд туслна.

Командыг толһалсн Элст балһсна 15-ч тойгта дундын школын директорин дарук Айса Мархутова,  Г.Жуковин нертә Троицк СОШ-ин лесничествин һардач Юлия Аксенова болн   эн школын «ЭКОС» гидг экологическ организацин һардач Валентина Бисюра уйн наста экологудыг эн марһанд сәәнәр белдв. Мана команд эн марһанд орлцхд Хальмгин лесничеств болн Калмлес дөӊ-тусан күргв.