Элстд хөөт өрк-бүлмүдин форум болв. Терүнд өнчн болн эк-эцкнрин хәләвр уга үлдсн бичкдүдин зөв харслһна төрмүд хәләгдв.

Таӊһчин социальн делгрлтин, күч-көлснә болн көдлмшәр тетклһнә министрин дарук Евгения Гордеева иим бичкдүдин социальн теткврин халхд кегдҗәх керг-үүлдврмүдин тускар зәӊглв. Таӊһчин сурһуль-эрдмин болн номин министр Николай Манцаев хөөт өрк-бүлмүдт ведомствин Күндлһнә һашгуд бәрүлҗ өгв. Өнчн болн эк-эцкнрин хәләвр уга үлдсн бичкдүдиг көвүчлҗ авсн өрк-бүлмүд дамшлтарн хувалцв.

Форумд таӊһчин бичкдүдин зөв харслһна элч О.Умгаева, Әрәсән бичкдүдин саӊгин региональн әӊгин ахлач О.Пюрбеев, «Негдсн Әрәсә» партин КРО-н политсоветин сегләтрин дарук Сергей Сухинин, министерствс-ведомствсин элчнр орлцв. Эн керг-үүлдвр «Әрәсәд үрн болһн чинртә» гисн партин төсвин халхар давулгдв. Өнчн болн эк-эцкнрин хәләвр уга үлдсн бичкдүдин төрмүдт һол оньг тусхах күслтәһәр эн форум бүрдәгдв.