Эндр Элстд, таӊһчин правительствин сүүрин ик залд 1917 җилин Октябрьск революцин 100 җилин өөнд нерәдгдсн «Алдр революц  Әрәсән Өмн үзгин жирһлд» гидг Цугәрәсән конференц болв. Хойр өдртән болх керг-үүлдвриг РАН-а Хальмг номин Цутхлӊ, Әрәсән тууҗлгч ниицән, таӊһчин правительств, таӊһчин сурһуль-эрдмин министерств болн КалмГУ бүрдәҗ давулҗана. Эн конференцд кесг һазрас ирсн номтнр орлцҗана. Тиигәд Москва балһснас, Чеченск республикәс, Дагестанас, Башкорстанас, Ростовск болн Волгоградск областьмудас, Краснодарск болн Ставропольск краймудас, Казахстанас, Узбекистанас, Моӊһлас, Китдәс, Японяс номтнр ирсн бәәнә.

Хальмг Таӊһчин Толһач Алексей Орлов конференцд бас орлцад, Октябрьск революцин чинрин, мана орн-нутгин тууҗд эзлҗәх ормин тускар ухан-тоолврарн хувалцв. Конференцд орлцачнр Н.Пальмовин нертә музейд одад, Октябрьск революцд нерәдгдсн һәәхүл хәләв. Цуг хальмг улсин түрүн съезд болсн Яшкулин района Чилгр селәнд номтнр бас одад, сойлын керг-үүлдврт орлцхмн.