Сентябрь сарин эклцәр кесн то-дигәр мана таӊһчд 40707 күн гриппәс тәрлһ кев, теднәснь 9127 бичкдүд болн 31580 бөдүн улс. Эннь цуг зуралсн тооһас 34 процент тогтаҗана. Энүнә тускар эндр гриппәр болн ОРВИ гемәр тогтсн бәәдлд нерәдгдсн селекторн селвлцәнә йовудт Хальмг Таӊһчин эрүл-менд харлһна министрин дарук Галина Динкиева зәӊглв.

Дааврта һардачин келсәр, намрин кемд 117784 күүнд тәрлһ кехмн гиҗ зуралгдҗана. Ода мана таӊһчур «Совигрипп» болн «Совигрипп детский» гидг вакцин авч ирсн бәәнә. Түрүн авч ирсн вакцин цуг кергтә эмин 49 процент тогтаҗана, болв цааранднь дәкәд керглгдҗәх эмиг авч ирхмн.

Урдаснь кесн тааврар эн җил 27780 күн гриппәр гемтхмн, теднәснь 2778 күн стационарт эмнлһнд тусхмн.