Көтчнрә района Тугтн селәнд «Ачур» гидг бөкнрин зал секлһнд нерәдгдсн байрин керг-үүлдвр болв.  Урднь бидн зәӊглсәр, селәнә муниципальн бүрдәцин толһач Дмитрий Мукеев эк-эцкиннь герт бөкнрин зал секх шиидвр авсмн. Дорас өсч йовх бичкдүд спортар соньмсҗ, цогц-махмудан батрулҗ цаган тустаһар давулхин төлә эн иим седвәр татсмн.

Селәнә бәәрн улсин дөӊгәр герт ясвр кегдв, кергтә спортивн инвентарь хулдҗ авгдв. Спортивн зал секлһнд демән күргсн улс дунд Әрәсән орн-нутгин Хүүвин депутат Марина Мукабенова бәәнә. Көтчнрә РМО-н администрацин толһач Валерий Очировла болн «Ростелеком» компанин Хальмг филиалын директор Арслан Корняковла хамдан М.Мукабенова байрин керг-үүлдврт орлцхар ирв. Тугтн селәнә улсиг ончта болн байрта йовдлла йөрәһәд, депутат спортивн инвентарь белглв.

Селәнә бәәрн күүкд күн Эльзята Менкенова М.Мукабеноваг болн А.Корняковиг поселкд интернет оруллһна төрт нөкд болхиг сурв. Арслан Батаевич эн төриг эврән бүрткх үгән өгв.

Байрин керг-үүлдврин хөөн күндтә гиичнр Б.Б.Дорджиевин нертә Тугтн селәнә дундын школд одв. Келхд, одахн школын спортивн залд капитальн ясвр кегдв. Тер өдрин бийднь гиичнр селәнә әмтнлә харһҗ күүндв.